ฯ นโม ตสฺส ภควโต อรหโต สมฺมาสมฺพุทฺธสฺสฯ
สทฺทนีติปฺปกรณํ (ปทมาลา)
คนฺถารมฺภกถา
ธีเรหิ มคฺคนาเยน, เยน พุทฺเธน เทสิตํ;
สิตํ ธมฺมมิธญฺญาย, ญายเต อมตํ ปทํฯ
ตํ นมิตฺวา มหาวีรํ, สพฺพญฺญุํ โลกนายกํ;
มหาการุณิกํ เสฏฺฐํ, วิสุทฺธํ สุทฺธิทายกํฯ
สทฺธมฺมญฺจสฺส ปูเชตฺวา, สุทฺธํ สนฺตมสงฺขตํ;
อตกฺกาวจรํ สุฏฺฐุ, วิภตฺตํ มธุรํ สิวํฯ
สงฺฆสฺส จ’ญฺชลิํ กตฺวา, ปุญฺญกฺเขตฺตสฺส ตาทิโน;
สีลสมาธิปญฺญาทิ-วิสุทฺธคุณโชติโนฯ
นมสฺสนาทิปุญฺญสฺส, กตสฺส รตนตฺตเย;
เตชสาหํ ปหนฺตฺวาน, อนฺตราเย อเสสโตฯ
โลกนีติวิยตฺตสฺส, สตฺถุ สทฺธมฺมนีติโน;
สาสนตฺถํ ปวกฺขามิ, สทฺทนีติมนากุลํฯ
อาสวกฺขยลาเภน, โหติ สาสนสมฺปทา;
อาสวกฺขยลาโภ จ, สจฺจาธิคมเหตุโกฯ
สจฺจาธิคมนํ ตญฺจ, ปฏิปตฺติสฺสิตํ มตํ;
ปฏิปตฺติ จ สา กามํ, ปริยตฺติปรายณาฯ
ปริยตฺตาภิยุตฺตานํ, วิทิตฺวา สทฺทลกฺขณํ;
ยสฺมา น โหติ สมฺโมโห, อกฺขเรสุ ปเทสุ จฯ
ยสฺมา จาโมหภาเวน, อกฺขเรสุ ปเทสุ จ;
ปาฬิยตฺถํ วิชานนฺติ, วิญฺญู สุคตสาสเนฯ
ปาฬิยตฺถาวโพเธน, โยนิโส สตฺถุสาสเน;
สปฺปญฺญา ปฏิปชฺชนฺติ, ปฏิปตฺติมตนฺทิกาฯ
โยนิโส ปฏิปชฺชิตฺวา, ธมฺมํ โลกุตฺตรํ วรํ;
ปาปุณนฺติ วิสุทฺธาย, สีลาทิปฏิปตฺติยาฯ
ตสฺมา ตทตฺถิกา สุทฺธํ, นยํ นิสฺสาย วิญฺญุนํ;
ภญฺญมานํ มยา สทฺท-นีติํ คณฺหนฺตุ สาธุกํฯ
ธาตุ ธาตูหิ นิปฺผนฺน-รูปานิ จ สลกฺขโณ;
สนฺธินามาทิเภโท จ, ปทานํ ตุ วิภตฺติ จฯ
ปาฬินยาทโยจฺเจว-เมตฺถ นานปฺปการโต;
สาสนสฺโสปการาย, ภวิสฺสติ วิภาวนาฯ